1 Kronieken 11
01Dou kwammen ale Isrelieten bie nkander bie David in Hebron en ze zeden tegen hom: "Kiek, hier bin we, joen aigen vlaais en bloud!
02Vrouger, dou Saul nog keunenk was, was ie ja al overste over t leger van Israël. Dou het de HEER, joen God, aan joe beloofd: 'Ie zellen hedder wezen over mien volk Israël. Ie zellen heur keunenk wezen.'"
03De oldsten van Israël kwammen bie de keunenk in Hebron en David sloot doar n verbond mit heur mit de HEER as getuge. Dou zaalfden zai David keunenk over Israël, zo as de HEER deur Samuël veurzegd haar.
04David ging mit t haile leger van Israël noar Jeruzalem, dat dou nog Jebus haitte; doar woonden van oldsheer de Jebusieten.
05t Volk van Jebus raip tegen David: "Ie kommen der bie ons nait in!" Evenzogoud veroverde David de baargvesting Sion, dij nou de Davidstad nuimd wordt.
06David haar beloofd, dat wèl as eerste aan n Jebusiet n klap oetdailen zol, dij zol de hoogste aanvoerder worden. Joäb, n zeun van Seruja, klaauwsterde as eerste noar boven en wer dou de eerste aanvoerder.
07David ging in de baargvesting wonen; doarom wordt dij nou de stad van David nuimd.
08Hai baauwde de stad rondomheer van de Millo òf aan aal groder, Joäb baauwde t overge van de stad weer op.
09Zo ging David aal mor wieder; hai wer aal machteger. Dat kwam, de HEER van de legermachten ston hom bie.
|
